बाई कैसे दत्तगुरू पाहिले ॥
कृष्णातिरि औदुंबरि राहिले ॥धृ०॥
दंड-कमंडलु हाती ॥ अंगी चर्चुनि विभुती ॥
पायि पादुका घालुनिया चालिले ॥बाई०॥१॥
उदकपात्र हाती धरुनी ॥ भक्त येती ओलेत्यानी ॥
कोणि प्रभुच्या नामस्मरणी गुंगले ॥बाई०॥२॥
पंचामृती पूजनासी ॥ भक्त येती माध्यान्हासी ॥
नैवेद्यासि पक्व अन्न आणिले ॥बाई०॥३॥
फल तांबूल अमूप ॥ प्रदक्षिणा धूप दीप ॥
कोणी लोटांगण घालू लागले ॥बाई०॥४॥
संध्याकाळी धूपारती ॥ गर्दी पालखीच्या भोवती ॥
तेहतीस कोटी सुर पाहू पातले ॥बाई०॥५॥
काशीमध्ये स्नान करि ॥ भिक्षाटन करवीरी ॥
माहुरपुरि निद्रेलागी चालिले ॥बाई०॥६॥
काय वर्णू तेथिल महिमा ॥ नाही द्यावयासी उपमा ॥
कृष्णा म्हणे अल्पमती गाइले ॥बाई०॥७॥