चला जाउ पाहु तया चला जाउ पाहु तया ॥
पंढरिचा देवराया ॥धृ०॥
विप्र पुंडलिका घरी ॥
घेइ धाव वेगे हरी ॥
युगे अठ्ठाविस वरी ॥
तिष्ठे विटे राहुनिया ॥ चला०॥१॥
दोन्हि पाणि ठेउनि कटी ॥
उभा चंद्रभागातटी ॥
पाहे वाट भक्तासाठी ॥
साधु संतांचि माया ॥चल०॥२॥
चरण सुंदर किती ॥
प्रेमे चुरित राधा सती ॥
गळा माळ वैजयंती ॥
भाळि बुका लाउनिया ॥चला०॥३॥
शोभे तुळसिहार गळा ॥
भाळि कस्तुरिचा टिळा ॥
दाव करुनि सगुण लिला ॥
भक्ता साह्य होऊनिया ॥चला०॥४॥
सोसवेना भवव्यथा ॥
ऐक रुक्मिणीच्या नाथा ॥
नेइ माहेरासि अता ॥
कृश झालि बहुत काया ॥चला० ॥५॥
भक्त कितिक उद्धरिले ॥
नाहि गणित कोणि केले ॥
ऐसे पांडुरंग भले ॥
कृष्णा लीन झालि पाया ॥चला०॥६॥