तूझिये भेटिचि बहू आस रे मोरया ॥
लेखितां बहुत झाले दिस रे मोरया ॥
कां बापा धरियेलें उदास रे मोरया ॥
वियोगे झालों कासाविस रे मोरया ॥१॥
तूजविण कोण आह्मा आहे बा मोरया ॥
एक वळ कृपादृष्टि पाहे रे मोरया ॥धृ॥
रात्रंदिवस वाट पाहे रे मोरया ॥
निढळावरीं ठेऊनी बाहे रे मोरया ॥
वेगि तूं येई लवलाहि रे मोरया ॥
धेनू वत्सालागि जसि मोहे रे मोरया ॥२॥
जन्मो जन्मीचा तुझा दास रे मोरया ॥
आणिक कोणाचि नाहीं आस रे मोरया ॥
एक वेळ उद्धरिं या दिनास रे मोरया ॥
त्रास देई सकळा कर्मास रे मोरया ॥३॥
संसारसागरीं दुःखभारीं रे मोरया ॥
एक वेळ भवसिंधु तारि रे मोरया ॥
आयागमन तूं निवारीं रे मोरया ॥
दिनानाथा एक वेळ तारिं रे मोरया ॥४॥
दीन वत्सल बाप आला रे मोरया ॥
साष्टांगि दडवत घाला रे मोरया ॥
मोरया गोसावी तन्मय झाला रे मोरया ॥
चरणांबुज देखोनिया निवाला रे मोरया ॥
तूजवीण कोण आम्हा आहे बा मोरया ॥
एकवेळ कृपादृष्टी पाहि रे मोरया ॥५॥