आलें तुझ्या रे दारीं नृपा, घालीं भिकेला करिं रे कृपा ! ध्रु०
नांव ऐकुनी तुझें
वाट दूर चालुनी
आलें उपाशी थकुनि भागुनी. १
मूठ घालितां मला
हीन दीन याचका
भांडार सारें रितेंच होय का ? २
ताट दाटलें तुझें
अन्न त्यांत राहिना,
उच्छिष्ट घालिं रे उपाशि या जना. ३
ज्ञानिया जनार्दना,
जनिस घातली न का ?
केला कुबेरापरि न का तुका? ४
मीच काय एकली
दारिं तुझ्या येउनी
जाईन विन्मुखी निराश होउनी? ५
घाल घाल रे नृपा,
वेळ काय लाविशी ?
जीव चालला, किती अंत पाहशी ? ६